Malcolm McDowell

Malcolm John Taylor, nado en Horsforth (Leeds) o 13 de xuño de 1943, é un actor inglés, coñecido como Malcolm McDowell. Criouse en Liverpool e formouse na Academia de Música e Artes Dramáticas de Londres antes de emprender unha carreira que se estendeu durante máis de cincuenta anos.

McDowell é coñecido polos polémicos papeis de Alex DeLarge en ''A Clockwork Orange'' de Stanley Kubrick (1971), a personaxe principal de ''Caligula'' (1979) e Mick Travis na triloxía formada por ''if....'' (1968), ''O Lucky Man!'' (1973) e ''Britannia Hospital'' (1982). Apareceu en filmes como ''Time After Time'' (1979), ''Cat People'' (1982), ''Gulag'' (1985), ''Star Trek Generations'' (1994), ''Tank Girl'' (1995), ''Gangster No. 1'' (2000), ''Easy A'' (2010), ''The Artist'' (2011) e ''O escándalo'' (2019). Tamén apareceu como o doutor Samuel Loomis no remake de 2007 ''Halloween'' e a súa secuela de 2009, ''Halloween II''.

McDowell tamén tivo unha serie de papeis en series de televisión como personaxes recorrentes en ''Entourage'' (2005-2011) e ''Heroes'' (2006-2007); e protagonizou ''Franklin & Bash'' (2011-2014) e ''Mozart in the Jungle'' (2014-2018). Posteriormente na súa carreira converteuse nun prolífico actor de voz en filmes, series de televisión e videoxogos como ''Metalocalypse'' (2007–2012), ''Bolt'' (2008), ''Fallout 3'' (2008), ''God of War III'' (2010), ''The Elder Scrolls Online'' (2014) e ''Call of Duty: Black Ops III'' (2015). Recibiu unha estrela no Paseo da Fama de Hollywood en 2012. En 2021, tivo un papel recorrente na serie cómica de terror paranormal ''Truth Seekers''. Παρέχεται από τη Wikipedia