John Hurt

Sir John Vincent Hurt, nado o 22 de xaneiro de 1940 en Chesterfield, Derbyshire e finado o 27 de xaneiro de 2017, foi un actor inglés de cine e de dobraxe de voces cuxa carreira abrangueu seis décadas. Comezou a gañar sona e recoñecemento polo seu papel secundario como Richard Rich no filme ''Un home para a eternidade'' (1966). Despois disto, interpretou papeis protagonistas, como John Merrick no filme de David Lynch ''The Elephant Man'' (1980), Winston Smith na adaptación ''1984'' (1984), Mr. Braddock no drama de Stephen Frears ''The Hit'' (1984) e Stephen Ward en ''Scandal'' (1989). Tamén é coñecido polos seus papeis en televisión como Quentin Crisp na serie ''The Naked Civil Servant'' (1975), Calígula en ''I, Claudius'' (1976) e o Doutor guerreiro en ''Doutor Who''.

Entre os outros filmes salientables de Hurt cóntanse o drama ''Expreso de medianoite'' (1978), o filme de terror de ciencia ficción ''Alien'' (1979), o filme de aventuras ''Rob Roy'' (1995), o suspense político ''V for Vendetta'' (2006), o suspense sobrenatural ''The Skeleton Key'' (2005), o filme de aventuras ''Indiana Jones and the Kingdom of the Crystal Skull'' (2008), a serie de ''Harry Potter'' (2001–11), os filmes de ''Hellboy'' (2004 e 2008) e o filme de espionaxe sobre a guerra fría ''Tinker Tailor Soldier Spy'' (2011). A súa escena final en ''Alien'' está considerada por numerosas publicacións como unha das máis memorables da historia do cine.

Recoñecible pola súa característica voz, foi tamén un destacado actor de dobraxe en filmes como ''Watership Down'' (1978), a animada ''The Lord of the Rings'' (1978), ''The Black Cauldron'' (1985) e ''Dogville'' (2003), así como na serie da BBC ''Merlin''.

Un dos derradeiros filmes de Hurt é ''Jackie'' (2016), así como ''Darkest Hour'', no que interpreta o Primeiro Ministro Británico Neville Chamberlain. Entre os seus galardóns, recibiu dos nomeamentos ós Premios Oscars, un Globo de Ouro e catro BAFTAs. Foi ordenado cabaleiro no 2015 polas súas contribucións ó drama. Παρέχεται από τη Wikipedia