Bohumil Hrabal

Bohumil Hrabal (Brno, 1914ko martxoaren 28a - Praga, 1997ko otsailaren 3a) txekoslovakiar idazle bat izan zen. 83 urte zituenean, klinika bateko bosgarren solairutik jausi zen, usoei jaten ematen ari zen unean. Oraindik zalantza dago istripua ala suizidioa izan zen.

Zuzenbidean doktorea zen. Era askotako lanbideak izan zituen, idazle izan baino lehen. 1963an hasi zen literatura-lanak argitaratzen, eta arrakasta handia izan zuen, baina 1968an, sobietarrek Txekoslovakia mendean hartu zutenean, debekatu egin zituzten haren liburuak 1976 arte. Hrabalen pertsonaiak ez dira heroiak, eta kontatzen duena eguneroko gertakizun xumeez betea da, ia era surrealista batean azaldua, ironiazko ikuspuntutik. Haren ipuin, liburu eta eleberri ezagunenak hauek dira: ''Ostře sledované vlaky'' (1965, ''Zorrotz begiratutako trenak'', Fernando Rey Escalerak euskaratua), Jiří Menzel-ek zinemara eramana; ''Inzerát na dům, ve kterém uz nechci bydlet'' (1966, ''Dagoeneko bizi nahi ez dudan etxe batentzat iragarkia''); ''Obsluhoval jsem anglického krále'' (Nik, Ingalaterrako erregearen zerbitzura egon naizen honek); ''Příliš hlučná samota'' (Bakartasun ardailaz beteegia); ''Postřižiny'' (1976, ''Haurtzaroko pertsonaiak''); ''Kdo jsem'' (1989, ''Nor naizen ni''). Wikipediatik informazioa lortu