Leonhard Euler

Leonhard Euler (Basilea, Suitza, 1707ko apirilaren 15a - San Petersburgo, Errusia, 1783 irailaren 18a) matematikaria eta fisikaria izan zen. Historiako matematikari handienetakoa, Arkimedesekin, Newtonekin eta Gaussekin batera, eta, argitaratutako lan kopuruari begiratuz gero, emankorrena dudarik gabe. Orduko matematika-arlo ia guztietan ekarpen garrantzitsuak egiteaz gain, terminologia eta notazio matematiko modernoaren sortzaileetakoa izan zen. Orobat lan garrantzitsuak egin zituen fisikan, mekanikan, hidrodinamikan, optikan eta astronomian. Oso ezaguna da Eulerren (e) zenbakiagatik, zenbaki hori kalkulu-formula askotan eta fisikan agertzen baita.

Luterotar Elizaren santu egutegian, Eulerren eguna ospatzen dute maiatzaren 24an. Kristau fededuna zen, Bibliaren hutsezintasunean sinesten zuena, eta bere garaiko ateisten aurkako apologiak idatzi zituen.

Bere helduaroaren zatirik handiena, San Petersburgon (Errusia) eta Berlinen (Prusia) bizi izan zen, eta aurkikuntza garrantzitsuak egin zituen kalkulu edo grafoen teoria gisako arlo desberdinetan. Terminologia modernoaren eta notazio matematikoaren zati handi bat ere sartu zuen, bereziki analisi matematikoaren alorrerako, adibidez, funtzio matematikoaren nozioa.​

Euler matematikari handienetako bat izan da, emankorrenetako bat, eta kalkulatzen da haren lan osoek hirurogei eta laurogei liburuki artean beteko lituzketela.​ Pierre Simon Laplace-ri egotzitako baieztapen batek adierazten du Eulerrek ondorengo matematikariengan izan duen eragina: «Irakur Euler, irakur Euler, bera da gu guztion maisua». Wikipediatik informazioa lortu